港超聯　獻傑志首騷　丹恩奴域：港超唔易踢

被譽為今季港超最矚目外援的黑山前鋒丹恩奴域，周四（25日）完成21日居家隔離並首度公開見傳媒之後，隨即於周六（27日）對冠忠南區的聯賽對決中披甲上陣，賽後「黑山伊巴」亦分享了港超聯初體驗的感覺。

今場對冠忠南區的對決，丹恩奴域下半場67分鐘換入安永佳，終於首嚐港超聯滋味，賽後這位39歲中鋒的亦講出自己第一身感受：「好攰啊！21日居家隔離之後，我得2日時間去為今場比賽盡量做準備，不過球隊贏到波，整體感覺幾好。」

傑志下半場一度要10人應戰，意味「藍鳥」餘下場上球員都要跑多兩步，「黑山伊巴」亦不例外，但這位曾征戰中超及韓職等更高水平聯賽的黑山前鋒，即刻發揮場上作用，有份為傑志打開紀錄的入球組織攻勢，他認為港超強度絕對不弱：「比賽一啲都唔容易，尤其今日（小西灣運動場）草地好冧，場上有啲位，你好似隨時會跌低咁；而且對手冠忠南區都冇輕易放棄，佢哋有好強嘅外援，係好唔容易對付，但呢啲困難我一早有晒心理準備。」