掛住打機 迪利阿里被索女友狠飛
《英超刨績王》加強版,最強數據一網打盡:http://win.on.cc/football/ 
熱刺中場迪利阿里今季發展唔多順利,球場內被領隊摩連奴打入冷宮,球場外又被名模女友Ruby Mae狠飛。據英國《太陽報》消息指,Ruby Mae頂唔順迪利阿里瘋狂沉迷玩網上遊戲《Fortnite》,已經正式搬離迪利阿里200萬鎊豪宅,正式分手。
迪利阿里同Ruby Mae近年離離合合,報道指兩人喺情人節前正式分手,而且喺社交網亦互相Unfollow對方,Ruby Mae更已執晒行李搬出迪利阿里間豪宅。據兩人朋友表示:「佢哋嘅關係一直唔穩定,依家睇嚟係正式玩完,Ruby受夠迪利阿里近期嘅行為,包括日日瘋狂打機,佢決定離開搵自己嘅真命天子。」
迪利阿里今季英超只係踢過1場正選,不過周中歐霸盃對禾夫斯貝加一役有波入,拎到自己2021年第1個入波,唔知情場失意嘅佢,事業有冇機會重新起飛。