港超聯 天水圍飛馬贈標準流浪「雙蛋」

20210228
東網電視
更多新聞短片
(黃雋謙攝)
「中銀人壽香港超級聯賽」周日(28日)頭場戲碼,經歷「保險金」風波後上訴得直的天水圍飛馬,靠達施華下半場個人梅開二度,以2比0擊敗標準流浪,聯賽取得2連勝之餘,亦成功打破對手聯賽不敗金身。
在今季沒有球會揀選香港大球場為主場下,今場港超是自上季煞科東方龍獅對富力R&F一役以後,首次在大球場作賽。賽前聯賽保持不敗的標準流浪,今場率先搶攻,6分鐘 ,林學曦接應姚浩明左路傳中,力壓天水圍飛馬守將衝頂,被梁興傑擋出。其後天水圍飛馬開始製造似樣埋門機會,23分鐘先有基斯的撞射被奧利斯輕鬆沒收,再有山度士的攻門,同樣未能威脅奧利斯。34分鐘,林學曦右路畀到禁區頂的林嘉緯,後者起左腳遠射,可惜未能命中目標,半場前雙方都未能打開紀錄。
易邊再戰,天水圍飛馬主動搶攻,50分鐘,達施華右路找到缺口突破,殺入禁區窄位起腳,被奧利斯撲出。其後雙方繼續嘗試組織攻勢,可惜頻頻出現傳球失誤,令比賽再度陷入膠着,68分鐘,孫銘謙一個轉身後左路殺落底線傳中,可惜被標準流浪守將解圍。74分鐘,天水圍飛馬終於靠一次反擊機會打破僵局,謝朗軒左路傳中,尾柱的達施華從後殺到,第一時間撞入,為球隊取得1比0領先優勢。落後的標準流浪,換入播磨浩謙及鄧子均加強進攻,但反撲未果,反被天水圍飛馬趁後防空虛再下一城,86分鐘,山度士交出直線,達施華接應單刀赴會,面對奧利斯冷靜射成2比0。最終天水圍飛馬亦將2球優勢維持到最尾,取得聯賽2連勝。
賽後天水圍飛馬主教練郭嘉諾,對球隊全取3分感到高興,但認為可以落場比賽更值得開心:「我頭先突登走埋去Philip哥(標準流浪總監李輝立)度,多謝佢哋幾間球會,協助我哋同愉園;我覺得對球迷同對手嚟講,我哋踢一場最好嘅波,係對本地球壇最好嘅交代。」
過去一周,天水圍飛馬一度因「保險金」風波而被判禁賽,去到周六(27日)才獲足總通知今日比賽可以如期舉行,「嘉諾Sir」形容自己過去幾日心情起起伏伏:「好耐未試過自己要做心態調整,對我嚟講今季喺飛馬嘅事情都幾多,我好想專心去教波,但有好多唔同嘅因素影響到我,好希望嚟緊可以專注喺球隊,盡我教練嘅責任,去贏好每場波,向老闆同球迷交代。」
至於標準流浪球員謝偉俊,就認為球隊失利要歸咎於球員大意:「一個唔小心,漏咗啲身後波,畀對手一個過頭波就輸咗反擊。」由於兩位巴西攻擊手祖連奴及亞加斯圖今場齊齊因傷缺陣,標準流浪只能派出全華班攻擊線應戰,謝偉俊承認進攻火力有所減弱,難免影響球隊實力。