韋利安助攻起孖 反勝狐狸向達哥致敬

20210228
東網電視
更多新聞短片
《英超刨績王》加強版,最強數據一網打盡:http://win.on.cc/football/ 
周日晚(28日)英超頭場,阿仙奴雖然收起隊長奧巴美揚等主力,但尼高拉斯比比、韋利安等副選大踢爭氣波,其中韋利安更兩番助攻,協助「兵工廠」作客反勝「3哥」李斯特城3:1,回報一直信任佢嘅主帥「達哥」阿迪達。
上周中歐霸戲劇性晉級嘅阿仙奴,之前5場聯賽僅1勝,今仗仲收起隊長奧巴美揚、布卡約沙卡等多名主力,改用尼高拉斯比比、韋利安等副選,而喺歐霸出局嘅「狐狸」李斯特城,繼續有「兵工廠剋星」占美華迪助陣,開波僅6分即由泰利文斯於右路突破射遠柱得手,協助李城極速先開紀錄。之後阿仙奴攞番主動權,39分鐘韋利安罰球傳中,其巴西同胞大衞雷斯攝到靚位頂入扳平,完半場前李城更有尼迪迪於禁區內犯手球,被罰12碼,拿卡錫迪操刀一針見血,半場反先2:1。
急於反撲嘅李城,下半場冇耐即有哈維班尼斯傷出,真係黑到冇朋友。禍不單行係於52分鐘,韋利安橫傳畀比比近門射成3:1,順利全取3分。
連同上周中歐霸反勝賓菲加3比2在內,韋利安近2仗交出3個助攻,呢位周薪高達22萬鎊嘅老將,自今季加盟後一直冇料到,上年12月未經球隊批准,擅自同老友去杜拜玩,事後主帥阿迪達冇鬧爆佢之餘,仲繼續有正選打,一度惹來隊友不滿,被粉絲嘲諷為「金章安」有特權。但韋利安因表現實在太差,早前被貶為後備,佢亦痛定思痛下,近期終於有貨交,最感安慰嘅,一定係成日為佢講好話嘅「達哥」喇。