國米「紅魔3人」齊入波！曼聯後悔未

足球博彩神器，每日重心提供盡在《彩報》：http://win.on.cc/football/　

曼聯喺英超僅同車路士打和0比0，但3位前紅魔鬼球員盧卡古、達美安、阿歷斯山齊士就喺周日(28日)深夜意甲，一齊入波，協助國際米蘭主場以3比0大勝熱拿亞，形成強烈對比。

盧卡古狀態弗到震，以一招「直線盤球」個人表演，開賽32秒就入波，成為自2004/05年球季有統計以來，國米喺意甲第2快入球，第1快都係盧卡古創下，佢喺上年10月對賓尼雲圖，開賽28秒入波。

盧卡古今季意甲已經有18球進帳，僅落後射手榜一哥C朗1球，呢位比利時國腳下半場轉換角色，傳畀達美安射入，亦係呢位右閘加盟國米後首個聯賽入球。

至於阿歷斯山齊士後備上陣僅1分鐘，趁熱拿亞門將馬迪亞比連撲出不遠，頂入成3比0。國際米蘭取得聯賽5連勝，近3場都攻入對手3球，火力全開，繼續領先第2位AC米蘭4分。