馬體會重響勝鼓　施蒙尼成最強領隊

足球博彩神器，每日重心提供盡在《彩報》：http://win.on.cc/football/　

近期連續3場不勝嘅「一哥」馬德里體育會，周一(1日)凌晨作客以2比0擊敗維拉利爾，將榜首優勢再次拉開到5分，而且仲比次席皇家馬德里踢少1場，爭冠形勢依然大好。阿根廷籍主帥施蒙特再贏波後，追平傳奇阿拉干利斯紀錄，成為馬體會史上贏波次數最多教頭。

上周中喺歐聯輸波嘅馬德里體育會，今場表現慢熱，上半場靠維拉利爾嘅艾方素柏祖沙擺烏龍領先，半場期間馬體會換入祖奧菲歷斯加強火力，呢位葡萄牙國腳亦喺69分鐘入波拉開比數，最終馬體會贏2比0，為周日(7日)迎戰皇家馬德里嘅榜首大戰打下強心針。

今場贏波係施蒙尼執教馬體會第308場勝仗，追平阿拉干利斯嘅球會紀錄，而且阿拉干利斯用咗612場嚟拎呢個成績，施蒙尼只係需要512場就做到，足足少用100場時間，更加見到施蒙尼呢個紀錄嘅含金量。