哥迪奧拿證實　「兒子」加盟巴塞隆拿

足球博彩神器，每日重心提供盡在《彩報》：http://win.on.cc/football/　

曼城近期氣勢如虹，一對中堅魯賓戴亞斯同史東斯組合最強防守組合，搞到被視為明日之星嘅艾利加西亞坐長冷板。曼城領隊哥迪奧拿日前證實，呢位西班牙小將已經簽約下季重返巴塞隆拿，同時對於失去呢位「兒子」表示心痛。

20歲嘅艾利加西亞同曼城嘅合約季尾完結，依家已經可以自由同任何球會斟介，之前一直傳佢會重返巴塞隆拿，哥迪奧拿日前終於親口證實：「艾利加西亞好似我個仔一樣，上季復賽後佢係曼城最佳中堅，從來唔會犯錯，而且仲喺歐聯8強上陣，佢將會去巴塞隆拿比賽，絕對唔係一個平凡球員，最近2場賽事冇選佢入隊令我心碎，呢個亦係所有執教大球會領隊嘅難處。」

艾利加西亞上季為曼城喺各賽事上陣20場，表現獲得球會高度評價，但今季只係上陣過9次，其中英超只有3次上陣。曼城依家仲有尼敦阿基同拿樸迪兩大貴價中堅做後備，艾利加西亞離隊嘅即時影響應該唔算太大。