拖連奴爆疫想改期　意甲賽會堅持繼續踢？

香港時間周二（2日）深夜原定有場意甲拉素對拖連奴上演，不過因為拖連奴早前隊內爆疫，球員需要接受隔離，據報拖連奴已要求將比賽押後，但意甲賽會傾向繼續比賽，最終結果仲要等有關方面正式公布。

拖連奴早前有職球員確診新冠肺炎，原定上周五深夜主場對薩斯索羅嘅聯賽已宣告押後，雖然球隊喺最近一次檢測冇新增個案，球員亦可恢復個人操練，不過佢哋周二深夜能否出戰拉素仲係未知數。

由於今季意甲賽程密麻麻，賽會認為喺情況許可下，拖連奴作客拉素一仗應如期上演，否則安排日後補賽會有一定困難，而且對於拖連奴目前嘅護級對手亦可能出現不公情況；不過拖連奴認為球員現時只可作個人操練，唔屬於喺正常環境下備戰，如果咁樣落場，對佢哋爭勝會有好大影響，應該改期先合乎公平原則。