因為一幅圖　蘇B怒斥車仔無恥

最強博彩盤路過關神器《串績王》：http://win.on.cc/football/　

英超車路士主場同曼聯打和0比0，車仔翼鋒赫臣奧杜爾喺禁區內疑似犯手球，但球證艾維爾卻唔判12碼，引起極大爭議。賽後曼聯領隊蘇斯克查除咗不滿球證漏判12碼之外，更加怒斥車仔無恥，賽前發文間接向球證施壓，造成今次事件。

車路士官網喺比賽前夕發表比賽預告，提到首循環同曼聯交鋒時，紅魔鬼隊長哈利馬古尼禁區內拉跌艾斯派古達一事，但球證冇吹罰曼聯12碼，仲配上當時照片，圖文並茂證明馬古尼的確犯規。

蘇斯克查指呢段文章係「出口術」向今場向球證施壓：「佢哋(車路士)喺場外耍手段，無恥地將談論馬古尼嘅內容放上官網，明顯想影響球證，你可以去睇下佢哋點樣寫，佢哋係向球證施壓。」

咁啱今場球證艾維爾睇完VAR後，認為唔係12碼，佢甚至自爆唔判12碼，係因為唔想呢件事成為話題，莫非真係因為車仔嘅「施壓文章」影響到佢判決？