碧咸現身邁阿密開操　希古恩比菲臘佬更搶鏡

韓職開鑼，即上《韓職刨績王》：https://win.on.cc/football/league/kd1/index.html　

邁阿密國際日前開操，為新一季美職作準備，新任主帥嘅前英格蘭兼曼聯名將菲臘尼維利主持球隊首課，就連老闆兼前隊友碧咸都要嚟撐場，仲喺個人社交平台話：「好似第一日返學嘅感覺！」

「菲臘佬」辭去英格蘭女隊主帥一職，走到美國拍住咸爺搵食，碧咸喺球隊開操首課都相當關注，親身到球隊觀操，似乎為前隊友「菲臘佬」打氣，佢之前都講過希望「菲臘佬」可以帶領邁阿密國際今季爭取到好成績。

不過，講到球隊首課操練，另一個焦點落在阿根廷前鋒希古恩身上，呢位33歲名將放完假之後，身型嚴重發福，仲未修身，兼且有個「大肚腩」，球迷睇到都嚇呆。

希古恩加盟美職聯之後，喺下半季只入個一球，球迷本希望佢可以喺新一季恢復狀態，邁阿密國際更加喺新賽季門票，以佢做主打嘅宣傳球星，但見到佢咁樣，喺球隊似養老咁款，就連碧咸都話：「希古恩仍要努力訓練，恢復狀態，咁樣先可以喺新球季為球隊入波。」