碧基又傷抖3周　無緣歐聯鬥PSG

最強博彩盤路過關神器《串績王》：http://win.on.cc/football/　

巴塞隆拿日前淘汰西維爾，打入西班牙盃決賽，但亦付出沉重代價，中堅碧基該仗勇戰受傷，需要休息3星期，意味將無緣歐聯16強次回合作客巴黎聖日耳門(PSG)。

碧基上場西班牙盃踢足120分鐘，並攻入1球，但其實佢當時頂硬上，賽後經過檢查，發現呢位34歲老將拉傷右腳膝部內側韌帶，估計要抖3星期。

西班牙《阿斯報》指碧基今次係觸傷舊患，佢曾於上年11月整傷右腳膝部內側韌帶，需要開刀，結果缺陣3個月，幸好今次傷勢比較輕。

預料碧基將會缺陣3場西甲，包括對奧沙辛拿、侯爾斯卡、皇家蘇斯達，亦無緣3月11日凌晨歐聯16強次回合作客巴黎聖日耳門，巴塞首回合輸1比4，大勢已去。

此外，《巴黎人報》報道，因傷錯過首回合倒戈對巴塞嘅巴西王牌尼馬，近日已傷愈獨自訓練，雖然隊醫評估期康復進度無法趕及次回合主場迎戰巴塞，但普捷天奴近日接受訪問時稱，尼馬康復進度比預期理想，對巴塞一仗不排除派他上陣。