拉舒福特肩傷未斷尾　歐國盃後做手術

《英超刨績王》加強版，最強數據一網打盡：http://win.on.cc/football/　

拉舒福特今季為曼聯各項賽事攻入18球，表現唔錯，但其實佢可以做得更好。英國傳媒報道，23歲嘅「福仔」一直受膊頭傷患影響，但由於賽程頻密唔停得，要等到今夏歐國盃結束後，佢先可以做手術根治傷患。

福仔近期飽受肩傷困擾，不過佢仲死撐，佢身邊隊友都覺得，佢仲可以忍痛落場比賽係好神奇嘅事，不過福仔無論喺曼聯及英格蘭都係重要一員，若然呢段時間缺陣，對球隊影響好大。

曼聯今季仲要爭前4、歐霸盃同足總盃，球季結束後，就要代表英格蘭出戰歐國盃，特別係近日英國有意主辦今屆賽事，英軍可以主場出擊，福仔更加唔想錯過。

英國《太陽報》引述《電訊報》消息，拉舒福特嘅肩膊肌肉撕裂傷患，要等到歐國盃結束後，先會做手術根治，呢段時間佢都會負傷上陣。