巴塞會長選舉拉票 拉波塔簽阿古路拍美斯

20210306
東網電視
更多新聞短片
足球博彩神器,每日重心提供盡在《彩報》:http://win.on.cc/football/ 
過去1年負面新聞多多嘅巴塞隆拿,周日(7日)將會舉行矚目嘅會長選舉,近11萬名會員將以一人一票,由拉波塔、方特同費爾沙3位候選人入面選出「揸弗人」。民調顯示前度會長拉波塔呼聲最高,曾經擔任過巴塞隆拿會長7年嘅拉波塔,選前訪問表明如果當選,同佢關係極佳嘅美斯必定會繼續留隊,同時更會簽埋另一阿根廷前鋒阿古路。
曾經喺2003至2010年出任巴塞會長嘅拉波塔,選戰前當然要講勝負關鍵議題美斯,拉波塔就放出狠話:「喺美斯眼中,我係最有經驗同決心嘅候選人,最重要係我會對佢坦白。我肯定如果唔係我當選,美斯一定唔會留隊,我同佢關係非常之好,而且互相尊重,或者財政上我哋唔可以同其他由國家支持嘅球會競爭,但美斯從來唔係為錢踢波,佢想同巴塞隆拿一齊贏,我會畀佢睇到呢個可能性。」
拉波塔挽留美斯嘅其中一招,就係簽埋佢喺阿根廷國家隊嘅好友阿古路,雖然佢冇親口點名,不過西班牙《每日體育報》消息指,拉波塔陣營向傳媒放風,只要佢一當選,就會同該曼城傳奇前鋒簽約。阿古路同曼城嘅合約去到今個季尾完結,依家已經可以自由同任何球會簽約,報道指拉波塔已經同阿古路密切接洽,只係等星期日嘅會長選舉結果出爐。
據社交網站民調顯示,拉波塔目前以58%得票成為大熱門,但比起3個月前係下跌6%,被視為最大競爭者嘅方特就以「即刻搵沙維執教」做賣點,並且得到佩奧爾同另一位前會長加斯柏助選,最新調查有28%支持率,而且比3個月前急升13%,氣勢相當強勁。至於本身係巴塞隆拿律師嘅費爾沙,政綱話會支持現任朗奴高文,但就被視為「陪跑」份子。