布魯士承認向球員動粗　揚言捉洩密內鬼

《英超刨績王》加強版，最強數據一網打盡：http://win.on.cc/football/　

紐卡素近日爆出內亂，領隊布魯士被指同翼鋒馬特列治發生激烈爭執，布魯士更喺訓練場向該球員動粗，紐卡素星期日(7日)晚作客西布朗嘅護級生死戰前，布魯士直認報道係「真有其事」，但就表明內部事件曝光係因為有「二五仔」向傳媒洩密，揚言會全力「捉鬼」。

布魯士喺賽前記者會表示：「我唔會否認同馬特列治嘅衝突，但呢啲事每星期喺訓練場都會發生，很不幸今次事件畀人鬧大。馬特列治已經道歉，對我嚟講成件事已經結束，不過有一件事值得關注，係紐卡素內有人向傳媒洩密。」

英國《每日郵報》近期獨家爆出唔少紐卡素消息，包括門將卡爾達路被棄用、布魯士動粗同埋球員不滿訓練時間不足等等，布魯士就話：「好明顯有人向(《每日郵報》)個記者爆料，最令人失望係爆料人一定係球會內部人士，我哋會盡力搵出呢個內鬼。」