天才表弟出道　佢係英俊版夏蘭特！

日職開鑼，即上《日職刨績王》：https://win.on.cc/football/league/jleague/index.html　

艾寧夏蘭特被喻為天才前鋒，未來世界足球先生候選人之一，但球迷成日笑佢個樣似「魔人布歐」，令佢好難走偶像派路線，不過呢方面缺失或者可以由佢表弟填補。年僅17歲嘅夏蘭特表弟泰蘭特Tjaaland近期廣受關注，因為佢喺37場青年賽攻入64球，入球能力拍得住佢表哥！

夏蘭特喺莫迪出身，其後加盟薩爾斯堡，好快就喺歐聯賽場廣受注目，曼聯曾經斟過佢，但最終佢揀咗去多蒙特，並繼續喺歐聯賽場不停入波，未來幾年相信佢好快會加盟歐洲頂級豪門，更被視為下一世代同基利安麥巴比喺金球獎及世界足球先生嘅最大競爭對手。

由於夏蘭特嘅關係，佢嘅親屬成員都受到關注，其中佢17歲表弟泰蘭特正仿傚佢嘅成名路，現時效力莫迪青年軍，不過已經開始顯露鋒芒，佢係球隊嘅入球機器，37場入64球，場均1.72球之多，佢仲係一名外型俊朗嘅金髮中鋒，將來同表哥夏蘭特拍住上，大把世界！