PSG唔留力　麥巴比法足盃踢足全場入2球

韓職開鑼，即上《韓職刨績王》：https://win.on.cc/football/league/kd1/index.html　

巴黎聖日耳門(PSG)雖然要喺周四(11日)凌晨歐聯16強次回合主場出戰巴塞隆拿，但球隊喺周日(7日)凌晨法國足總盃32強作客弱隊比斯特，仍然全力出擊，包括基利安麥巴比踢足全場，結果大勝3比0晉級16強。

由於PSG喺歐聯16強首回合作客大勝巴塞隆拿4比1，次回合仲有主場之利，教練普捷天奴當正球隊已經晉級，今場踢盃仔，一樣唔留力。開賽9分鐘就由基利安麥巴比個人表演，由場中圈位置長驅直進射入，呢位法國國腳跟住仲有1次勁射中柱彈出。

臨完上半場，達斯拿扭入禁區後，回傳畀沙拉比亞射成2比0，踢到下半場中段，基利安麥巴比近門撞入成3比0。

大局已定情況下，教練普捷天奴仍然畀麥巴比踢足全場，似乎覺得佢係後生仔，唔需要抖，基利安麥巴比喺歐聯16強首回合射入3球，次回合等睇佢表演。

至於早前受傷嘅迪馬利亞今場後備上陣復出，PSG人腳日趨完整，難怪普捷天奴當巴塞冇到。