般奴當選球員先生　曼聯就會唔見4500萬

最強博彩盤路過關神器《串績王》：http://win.on.cc/football/　

曼聯中場般奴費南迪斯今季表現大勇，喺英超已經射入15球及10次助攻，成為今季英格蘭球員先生獎項嘅大熱人選。英國傳媒指，如果般奴費南迪斯獲得呢項殊榮，曼聯就需要向佢前球會士砵亭，支付多420萬鎊(約4,500萬港元)轉會費。

般奴費南迪斯上年1月以4,660萬鎊固定轉會費，由士砵亭轉投曼聯，轉會條款之中有另外總值2,120萬鎊「浮動轉會費」，當中包括如果般奴費南迪斯當選英格蘭球員先生，或者成為金球獎三甲，曼聯就要畀多420萬鎊轉會費。換言之，呢位葡萄牙國腳表現愈好，曼聯愈要破財。

對上1位曼聯球員當選英格蘭球員先生，已經係2009/10年球季嘅朗尼，如果般奴費南迪斯真係攞獎，曼聯呢420萬鎊抵畀啦。