美斯父子撐場　拉波塔再任巴塞會長

《串績王》新登場，最強博彩盤路過關神器：http://win.on.cc/football/　

備受注目嘅巴塞隆拿新會長選舉周日(7日)結束，大熱門拉波塔以壓倒性姿態贏出，第2度登上巴塞隆拿會長位置。阿根廷球王美斯喺今次選舉中，亦破天荒現身投下神聖一票，據聞佢嘅心水就係同佢關係極佳嘅拉波塔，選舉結果令阿根廷球王來季留隊機會大大提高。

現年58歲嘅拉波塔喺2003至2010年間出任巴塞隆拿會長，在任期間贏過2次歐聯冠軍同4次西甲冠軍，佢今次以30,184票當選，佔總投票(55,611票)額嘅54%，順利擊敗另外2位候選人方特同費爾沙。拉波塔嘅重點競選政綱，就係話會用盡所有能力令美斯留隊，同時強調只有佢當選，先至有可能會令美斯決定留低。

拉波塔當選後，被問到會唔會聽日即刻搵美斯傾，呢位新任會長就回應：「點解要聽日？我可以今晚就搵美斯傾，成個夜晚流流長咁多時間。」喺今次投票當中，美斯亦歷來第1次現身投票，佢帶埋囝囝堤亞高一齊去票站投票，據悉佢嘅心水人選就係拉波塔。