曼城火力全開　大炒「聖人」帶出14分

《英超刨績王》加強版，最強數據一網打盡：http://win.on.cc/football/　

周四(11日)凌晨英超獨腳戲，「一哥」曼城主場出擊火力全開，以5比2大炒修咸頓全取3分，曼城贏波後拋離次席曼聯14分，未有因上輪「打吡戰」輸波而冧檔，重奪英超冠軍機會仍然係相當之高。

曼城今場15分鐘由奇雲迪布尼先開紀錄，雖然10分鐘後輸12碼被禾特普斯追平，不過曼城始終技高一籌，馬列斯40分鐘入波再度領先，根度簡完半場前擴大比數到3比1，打穩贏波根基。換邊後，馬列斯55分鐘攻入今場個人第2球，查阿當斯1分鐘後回敬一球，但奇雲迪布尼59分鐘亦都梅開二度，帶領曼城大勝5比2完場。

數據顯示，今場係曼城領隊哥迪奧拿執教生涯，第91次單場攻入5球或以上，平均每執教8場波就有1次「5+」入波賽事，堪稱係進攻大師。哥迪奧拿賽後表示：「英超嚟到關鍵時間，我哋仲有9場比賽，我哋仲需要5至6場勝仗，就由下場對富咸開始......」