【官宣】費查升呢!出任曼聯技術總監!

20210311
東網電視
更多新聞短片
《英超刨績王》加強版,最強數據一網打盡:http://win.on.cc/football/ 
英超勁旅曼聯物色多時嘅總監人選,周四(11日)終於落實,曼聯官方宣布現任足球發展部主管梅托,將會出任足球總監一職,至於季中加入蘇斯克查教練團嘅費查,就「升呢」為技術總監,唔單止會輔助蘇斯克查帶隊,仲要制定更長遠嘅發展目標,任重道遠。
曼聯多年來一直想增設總監一職,之前傳過搵雲達沙、甘波斯(里爾總監)、米切爾(摩納哥總監)等名牌,不過球會日前官方宣布,內部提升梅托同費查擔任足球總監同技術總監,之前獨攬大權嘅副主席活華特就會逐步淡出。活華特表示:「今次任命對球會發展相當重要,梅托一直係曼聯發展嘅核心人物,佢對球會相當熟悉,新位置有助佢領導球會改革;費查有曼聯DNA,佢會喺足球事務上提供專業意見。」曼聯表明費查今季會繼續兼顧近2個月嘅教練工作,下季就會全身投入技術總監一職。
費查接受任命後亦興奮表示:「好榮幸可以出任曼聯呢個全新職位,球隊依家向住正確方向前進,好期待同蘇斯克查以及一班職員繼續合作;梅托出任足球總監,將會幫助球會年輕球員發展,好開心見到全隊上下同心合力創造成功嘅新世紀。」