摩連奴：搵到使用巴利說明書

《串績王》新登場，最強博彩盤路過關神器：http://win.on.cc/football/　

加里夫巴利近仗大爆發，今季以外借身份重返熱刺，上陣22場轟入10球，包括近3場聯賽入4球，同哈利卡尼、孫興民同盧卡斯莫拉合組嘅攻擊4人組，令人賞心悅目，領隊摩連奴透露，為咗好好使用巴利，就連上陣時間都要大家商量好，令到球隊贏波，大家開心。

摩連奴表示：「我想保持佢嘅氣勢，需要合理地使用佢，我哋互相取得信任。巴利嘅上陣時間，都係我同佢一齊決定嘅，對水晶宮一仗，第4裁判睇到我哋都笑，佢可能覺得我同巴利嘅對話好有趣，我同巴利講：『你想踢幾耐？再踢5分鐘？10分鐘？』大家有商有量。」

摩佬坦言，現時佢同巴利關係非常好，雖然都想佢踢足全場90分鐘，但咁樣唔現實。不過事實上隨住巴利復甦，熱刺成績亦回穩，歐霸連英超4連勝，熱刺攻入13球當中，巴利就佔5球。