曼聯烏龍波小勝韋斯咸　蘇斯克查將續約

《英超刨績王》加強版，最強數據一網打盡：http://win.on.cc/football/　

周一(15日)凌晨英超大戰，曼聯主場憑住對手一個烏龍波，以1比0小勝韋斯咸。「紅魔鬼」贏波後重上第2位，雖然仍落後榜首曼城14分咁多，但依家同第5位嘅韋斯咸距離拉開到9分，前4席位非常穩陣。

曼聯今場有拉舒福特傷愈復出，同般奴費南迪斯、格連活特合組攻擊線，基本上係完全控制戰局，韋斯咸全場冇任何中龍攻門，不過「紅魔鬼」贏形勢之餘亦破關乏力，最終只靠韋斯咸中堅奇治戴臣53分鐘擺烏龍，小勝1比0全取3分。

曼聯今季成績優異，據英國《每日郵報》消息，曼聯已經準備向只剩1年合約嘅蘇斯克查續約，開出嘅3年新約入面，年薪會由700萬英鎊加到900萬英鎊，報道更指蘇斯克查會喺短期內正式動筆簽約。