高普投降　承認利物浦或無緣下屆歐聯

足球博彩神器，每日重心提供盡在《彩報》：http://win.on.cc/football/　

英超有3隊打入今屆歐聯8強，包括曼城、利物浦、車路士，成為大贏家。不過，下屆賽事好可能冇咗利物浦，因為紅軍主帥高普已經投降，承認以球隊目前情況，幾乎冇可能奪得歐聯冠軍，而打入英超前4位，機會亦非常渺茫，意味利物浦好可能失去下屆歐聯入場券。

高普接受德國名宿馬圖斯訪問時，表示利物浦難以參加下屆歐聯，佢話：「我都想樂觀去睇件事，但利物浦目前喺英超嘅排名同形勢，幾乎冇可能打入前4位，曼城、曼聯領先好多，車路士已經殺上來，熱刺亦正在冒起，加入競爭行列，要透過聯賽前4位，取得歐聯參賽資格，實在非常困難。」

當馬圖斯問高普，利物浦有冇機會奪得今屆歐聯冠軍，以衞冕身份參加下屆賽事時，高普亦打定輸數：「你知道，我哋咁多傷兵，呢種情況通常攞唔到冠軍。」事實上，盛傳高普可能今季結束之後離隊，利物浦有冇份踢下屆歐聯，或者已經唔關佢事。