曼聯又做1哥！成歐洲最可持續發展球隊

《英超刨績王》加強版，最強數據一網打盡：http://win.on.cc/football/　

歐洲權威機構瑞士足球天文台(CIES)發表報告，在「可持續發展球會」榜上，曼聯位居榜首，仲話曼聯未來幾季可以橫掃歐洲，有能力重奪英超甚至歐聯等重大錦標，曼聯再度稱霸不是夢！

足球天文台根據各隊年齡結構、團隊穩定性及球員合約年期進行這次排名，曼聯喺上述3項綜合評分獲得最高分，報告指，曼聯目前嘅年齡結構啱啱好，而且經過幾季合作，球員之間嘅配合亦日漸成熟，最重要係球員都簽下長約，唔會咁容易被其他豪門拆骨，可以專心發展。

曼聯現時喺聯賽落後曼城14分，今季只能爭亞軍，不過仲有歐霸盃同英足盃兩個捧盃機會，至於重奪聯賽同歐聯就要等來季。

排喺呢個可持續榜嘅2至4位係皇家蘇斯達、畢爾包同熱刺，近年壟斷英超嘅曼城同利物浦分列5、6位，7至10位球會係修咸頓、巴塞隆拿、馬德里體育會同RB萊比錫。至於近年簽入多名年輕球員嘅皇家馬德里，則未入前10。