政府開綠燈　英超德國兵有望踢世盃外

足球博彩神器，每日重心提供盡在《彩報》：http://win.on.cc/football/　

由於德國政府對來自英國嘅入境人士採取嚴格管制，令效力英超嘅德國球員回國收到限制，日前德國國家隊主帥勒夫點兵時，亦被迫放棄部份效力英超嘅愛將，周四德國足總透露，已獲衞生部門放寬限制，根度簡及迪姆華拿等喺英超搵食嘅球員，可以特殊通道入境，為德國隊出戰本月底嘅世盃外。

呢個消息對德國足總嚟講的確喜訊，對勒夫點兵及戰術運用上可以有更多選擇，家陣所有由英國入境嘅德軍可以獲有條件嘅豁免，入境時必須要有無確診嘅報告，向國家隊報到之後要留喺隔離泡泡，若非練習或比賽就要自我隔離。

世盃外今個月開打，德國隊今個月25日主場對冰島，28號對羅馬尼亞及31號主場鬥北馬其頓。上述條件同樣可以放寬畀從英國入境嘅冰島球員，勒夫周五將會公布大軍名單，今次獲得政府放寬，車路士嘅迪姆華拿、夏維斯、曼城嘅根度簡及阿仙奴嘅賓特尼奴等有望被重召入隊。