PSG向麥巴比開2.8億年薪合約　佢咁回應

韓職開鑼，即上《韓職刨績王》：https://win.on.cc/football/league/kd1/index.html　

法國《隊報》爆料，指巴黎聖日耳門(PSG)為咗綁實「新世代球王」基利安麥巴比，決定向呢位22歲法國國腳開出一份3,000萬歐元(約2.8億港元)年薪嘅新合約。不過，基利安麥巴比似乎興趣唔大，話仲要再考慮一下。

基利安麥巴比今季法甲已經射入18球，而喺歐聯16強兩回合，合共射入4球，協助球隊淘汰巴塞隆拿，將球王美斯比下去。

加上基利安麥巴比只剩下1年幾合約，PSG絕對唔想佢離隊，所以不惜採取銀彈戰術，希望基利安麥巴比續約。

不過，盛傳皇馬一直計劃簽入基利安麥巴比，佢亦有意加盟「銀河艦隊」，繼承偶像C朗嘅衣缽，踏上球王之路，所以仲未肯同PSG續約。

PSG今次開出3,000萬歐元年薪，比佢現時年薪多500萬歐元，當今球壇亦好難有球會可以開出呢份天價合約。基利安麥巴比最終會揀金錢，亦或榮譽，大家拭目以待。