車路士提前慶祝入4強？波圖名宿堅扯火

足球博彩神器，每日重心提供盡在《彩報》：http://win.on.cc/football/　

車路士自從杜曹執教後成績突飛猛進，歐聯更加淘汰馬德里體育會殺入8強，早前抽籤成功避開拜仁慕尼黑、皇家馬德里同巴黎聖日耳門等勁旅，「只係」面對葡超球會波圖。據報車路士一眾球員喺得知抽籤結果後，即時瘋狂慶祝，搞到葡萄牙傳奇球星富達扯晒火，日前上電視怒轟車路士。

55歲葡萄牙名將富達，曾經喺1987年金球獎選舉排第2位，佢日前喺葡萄牙電視台《CMTV》怒插車路士：「當車路士球員知道抽中波圖後，佢哋就開始慶祝，我點解會知？我係睇英國傳媒報道，之後我再去查證發現的確有咁嘅事。波圖球員嚟緊兩回合一定要博埋條命，點解？因為車路士覺得自己已經出咗線，已經慶祝緊！車路士有權晉級，但晉級前一定要嚐波圖嘅血！」

富達對於呢輪8強大戰非常認真，據報佢唔單止親自致電波圖主帥沙治奧干斯卡奧講呢件事(車路士慶祝)，甚至乎逐個球員打電話作出鼓勵，叫佢哋踢爭氣波唔好衰畀車路士睇。