【官宣】碧咸再挖英兵　前阿仙奴球員加盟

《英超刨績王》加強版，最強數據一網打盡：http://win.on.cc/football/　

由「萬人迷」碧咸做班主嘅美職新軍國際邁亞密，繼聘用好兄弟菲臘尼維利做教練，同埋簽入英格蘭中堅梳爾哥斯後，周三(24日)再宣布羅致前英格蘭國腳基蘭基比斯，呢位阿仙奴青訓出身嘅左閘今夏約滿西布朗後，將會以自由身加盟。

國際邁亞密總監基斯軒達臣表示：「基蘭基比斯係個令人興奮嘅球員，佢嘅技術、經驗同效率會係球隊左路一大武器，佢足球生涯都係喺最高水平賽事，我哋相信佢可以將呢個水平帶畀球隊同埋美職。」

31歲嘅基蘭基比斯亦表示期待展開生涯新一頁，但表明依家會專注為西布朗踢護級戰。基蘭基比斯係阿仙奴青訓出身，效力「兵工廠」10年上陣超過100次，亦曾經10次代表英格蘭國家隊上陣。