連格隊友發威　成捷克首位外圍賽戴帽球員

最強博彩盤路過關神器《串績王》：http://win.on.cc/football/　

周四(25日)凌晨世界盃外圍賽歐洲區E組出現特大比數賽果，捷克以6比2狂勝愛沙尼亞，捷克中場湯馬士蘇錫克射入3球，成為球隊史上首位喺世界盃外圍賽上演帽子戲法嘅球員。

雖然捷克今場取得大勝，但卻係愛沙尼亞先開紀錄，當時只係開波12分鐘，由前鋒沙賓尼射入。不過，愛沙尼亞只係開心咗6分鐘，噩夢就開始，捷克由柏德列舒希克入波扳平，佢再助攻安東連巴拿克射入，反超前2比1。

跟住成為湯馬士蘇錫克表現時間，先係頭槌頂入，之後分別用右腳同左腳射入，踢到48分鐘已經完成「完美帽子戲法」。捷克再由積及贊圖射成6比1，就算愛沙尼亞臨尾追至2比6，都無補於事。

主角湯馬士蘇錫克上年1月加盟韋斯咸之後，一直有唔錯表現，今季更加大熟大勇，上陣29場英超射入9球，成為陣中首席射手，係韋斯咸今季成績突飛猛進嘅大功臣，「錘仔幫」有湯馬士蘇錫克同連格呢對「金黃中場」，爭入英超前4位不是夢。