狂射10腳！連格回歸戰「美斯」上身！

足球博彩神器，每日重心提供盡在《彩報》：http://win.on.cc/football/　

今年初由曼聯外借韋斯咸嘅連格，轉會之後演出全面翻生，更加順利重返英格蘭國家隊，周五(26日)凌晨對聖馬力諾一戰，呢位攻擊球員時隔656日後再披英格蘭戰衣，踢足全場嘅連格雖然未有入波，但扭波射門都「美斯上身」，英格蘭全場有32次射門，當中10次就由連格包辦，而且有5次命中目標，如果唔係聖馬力諾門將連環神救，連格今場數據肯定唔止1個助攻咁簡單。

對於再披英格蘭波衫，連格賽後亦喺社交網發文，佢揀咗一張自己「以1敵6」嘅相作為帖文圖片：「能夠再次著起呢件波衫，對我嚟講意義極大！過程中我付出過好多，所以今次成果更見甜美！」英格蘭領隊修夫基賽後亦表示：「好開心見到連格再一次享受足球嘅樂趣。」如果連格可以一直保持近期火熱狀態，今個夏天歐國盃決賽周一定會預埋佢。