古天奴膝傷提早收咧　今夏被掛牌出售

足球博彩神器，每日重心提供盡在《彩報》：http://win.on.cc/football/　

巴塞隆拿中場球星菲臘比古天奴，自上年12月底對伊巴傷出後一直休息，早前曾經飛去卡塔爾接受專家治療，原本預計嘅3個月養傷期已經過晒，但古天奴仍未復操之餘，巴塞隆拿周一(30日)宣布，古天奴已飛返祖家巴西接受另一位醫療專家治療，據報佢嘅膝傷相當嚴重，好可能要再次做手術，今場好大機會提早收咧。

西班牙《馬卡報》報道，菲臘比古天奴嘅膝傷傷勢復發，之前卡塔爾嘅專家未搵到結論，所以佢再飛返巴西接受檢查，相信短期內就會有報告，預計要進行第2次手術機會好高，如果真係落實開刀，菲臘比古天奴今季就唔會再有機會落場。

28歲嘅菲臘比古天奴季初受到朗奴高文重用，12場西甲上陣入過2球，不過報道指巴塞隆拿依家正實行年輕化，菲臘比古天奴好大機會會喺今個夏天被賣走。

《每日體育報》報道，巴塞打算今夏將古天奴出售，轉會費跟隨市價，亦即4000萬歐元，比起2018年由利物浦加盟嘅買入價1.6億歐元，大幅貶值1.2億歐元，不過古仔踢巴塞真係唔適合，因此巴塞有意將佢出售或外借，望能止蝕。