丹尼爾占士絕殺　威爾斯贏關鍵一戰

《英超刨績王》加強版，最強數據一網打盡：http://win.on.cc/football/　

世盃外歐洲區E組，比利時被公認為首名出線必然之選，次名位置多數由捷克同威爾斯競爭，兩隊周三(31日)凌晨交鋒踢出濃厚火藥味，最終各有1人食紅牌之下，威爾斯憑丹尼爾占士絕殺，主場以1比0擊敗捷克，贏得出線關鍵一仗。

分組賽首仗輸波嘅威爾斯，今仗主場出擊未見優勢，雖然捷克喺49分鐘就有柏德列舒希克打人被逐，但仍然係攻勢較多一隊。威爾斯喺77分鐘亦有後衛干拿羅拔斯兩黃一紅離場，但10打10之下反而搵到缺口，丹尼爾占士82分鐘接應加里夫巴利傳中近門頂入；補時階段祖朗頓6碼點瞓身擋出捷克埋門，最終威爾斯驚險小勝1比0。

連續4場國家隊賽事送出助攻嘅加里夫巴利賽後表示：「場波非常混亂，尤其係下半場，但我哋好想贏呢場比賽，最後靠兩次魔法(丹尼爾占士入波、祖朗頓救險)完成任務。我哋顯示出決心同鬥志，成功抗衡非常體力化嘅捷克。」威爾斯目前2戰1勝1負排第3位，而捷克就3戰1勝1和負排次席。