諗得過！利物浦考慮簽藍斯頂替韋拿杜姆

最強博彩盤路過關神器《串績王》：http://win.on.cc/football/　

利物浦中場韋拿杜姆將於今夏約滿，盛傳佢將會轉投巴塞隆拿，跟隨同胞朗奴高文搵食，紅軍今夏首要工作係收購番1位同級數中場，頂替佢嘅位置，據悉領隊高普心目中有3位人選，包括祖雲達斯中場艾朗藍斯。

艾朗藍斯2019年夏天由阿仙奴轉投祖雲達斯後，一直未能穩坐正選，令佢萌生去意。加上呢位30歲威爾斯國腳周薪達40萬鎊，亦令祖雲達斯無意留用佢，只要有球會提出簽艾朗藍斯，相信祖記樂意放人。

艾朗藍斯效力過阿仙奴11年，熟悉英超踢法同文化，絕對冇適應問題，利物浦簽入佢，可以「即食」，減少風險，的確係1個唔錯選擇。雖然早前有傳韋斯咸、水晶宮都想簽入艾朗藍斯，但相比紅軍嘅級數同財力，相信艾朗藍斯點都會選擇利物浦。

另外，高普亦睇中白禮頓中場比蘇馬、里昂中場艾奧亞，兩人分別24歲、22歲，勝在年輕當打。