車仔魔咒！迪姆華拿成北馬其頓榮譽公民？

《英超刨績王》加強版，最強數據一網打盡：http://win.on.cc/football/　

德國前鋒迪姆華拿去年高價轉會車路士後，表現一直飽受批評，把握力之差睇到球迷搖晒頭。德國日前喺世盃外意外輸畀北馬其頓，迪姆華拿嘅「世紀撻Q」成為賽事關鍵，佢成為德國罪人之餘，亦都做咗北馬其頓嘅英雄。北馬其頓媒體《SID體育》賽後特別「印刷」一張榮譽公民身份證送畀迪姆華拿，表揚佢喺呢場波作出嘅貢獻，玩嘢得嚟都相當侮辱，迪姆華拿真係要踢爭氣波啦！

德國傳奇前鋒奇連士文就向迪姆華拿表示同情：「所有球員都會錯失機會，不過呢場關鍵嘅係世界盃外圍賽，迪姆華拿肯定好嬲自己，佢今季喺車路士嘅情況都好艱難，我真係好同情佢。」英國《太陽報》就指迪姆華拿延續車路士「貴價前鋒魔咒」，或會步舒夫真高、費蘭度托利斯、基士文、梅度、艾華路莫拉達等前鋒敗走車路士嘅後塵。