施丹廢柴大囝失業半年　赴美搵碧咸挖撈

《串績王》新登場，最強博彩盤路過關神器：http://win.on.cc/football/　

被譽為球壇最偉大球員之一嘅前法國超級球星施丹，踢波勁就使多講，但佢兩個仔嘅天份就冇老竇咁醒，二囝盧卡踢緊西乙，大囝安素施丹仲大鑊已經失業半年無波踢，家陣搵碧咸幫手，喺美職邁阿密試腳，等緊咸爺嘅一份合約。

安素施丹今年已經26歲，係皇馬青訓出身，曾經係皇馬B隊隊長，只為一隊踢過一場國王盃，而2017年夏天佢離開皇馬之後，過住顛沛流離嘅生活，曾經去過西甲艾拉維斯半年，只踢咗4場就被解約，跟住去瑞士搵食，又再被借用去西乙，一年踢咗27次零入球。

夾着「施丹之子」個名2019年加盟葡超，半年後又返番去西乙，只係踢咗4場波，好多主帥都真係畀面佢老竇，但舊年10月被解約後到依家都無地方落腳，家陣去到美職試腳，相信碧咸都會睇住施丹嘅面子畀佢少少機會，但若然自己唔生性又無料，就真係好難維持好耐。