皇馬10年奀星變福將　擔大旗鬥紅軍

《串績王》新登場，最強博彩盤路過關神器：http://win.on.cc/football/　

皇家馬德里周三(7日)凌晨歐聯大戰利物浦，後防靈魂人物沙治奧拉莫斯受傷缺陣，唔少球迷都為皇馬條防線擔心，不過教練施丹就唔會太憂慮，事關球隊「10年奀星」拿祖費南迪斯近期踢出最佳狀態，皇馬近11場不敗佢場場正選，同華拉尼組成可靠中堅拍擋。

唔經唔覺，今個月底就係拿祖費南迪斯為皇馬首演10周年，雖然10年來大部份時間都係後備，但用到佢嗰陣通常都交到貨，近2個月喺沙治奧拉莫斯養傷期間，拿祖費南迪斯就用出色表現鎖定正選位置，自2月初復任正選後，皇馬連續11場比賽不敗佢都擔正，期間沙治奧拉莫斯傷愈踢過2場，施丹寧願選擇改踢3中堅，都要繼續將拿祖費南迪斯留喺正選陣容。

據西班牙《馬卡報》報道，已經31歲嘅拿祖費南迪斯同皇馬合約去到2022年夏天完結，經過近期連場突出表現後，皇馬已決定盡快同佢傾續約，呢位忠臣有望喺皇馬踢到收山。