巴舒亞伊顯身價　愛華頓同白俄羅斯咪一樣！

足球博彩神器，每日重心提供盡在《彩報》：http://win.on.cc/football/　

周二(6日)凌晨英超大戰，水晶宮憑住巴舒亞伊入替2分鐘即入波，作客1比1逼和愛華頓。巴舒亞伊賽前抱怨未受重用，被領隊鶴臣反擊「對白俄羅斯入波同喺英超入波係兩回事」，呢位比利時國家隊前鋒就用行動證明，佢對愛華頓同對白俄羅斯一樣都係入波當食生菜！

力爭歐洲賽資格嘅愛華頓，今場控制戰局製造唔少埋門，可惜李察利臣同卡維特利雲屢失良機，去到56分鐘先由占士洛迪古斯勁射破網；水晶宮落後下急起直追，日前埋怨未受重用嘅巴舒亞伊完場前6分鐘入替，落場2分鐘即為水晶宮追成平手，兩隊踢成1比1完場。

巴舒亞伊喺國際賽期間，為比利時大炒白俄羅斯嘅世盃外入波後，話自己喺水晶宮得唔到領隊信任，鶴臣早前就回應：「為超班嘅比利時贏白俄羅斯，射入8比0當中嘅1球，同喺英超對愛華頓係兩回事。」如果呢個係激將法，鶴臣可以話係大成功。