阿仙奴大清洗 3位大將等執包袱

2021年04月07日 15:01
東網電視
更多新聞短片
(Getty Images)
最強博彩盤路過關神器《串績王》:http://win.on.cc/football/ 
阿仙奴今季成績欠佳,目前只排英超第10位,如果未能奪得今屆歐霸盃冠軍,好可能無緣下屆歐洲賽,英國傳媒指兵工廠技術總監伊度已經開始為下季組軍做準備,計劃出售拿卡錫迪、韋利安、尼高拉斯比比,籌集資金畀領隊阿迪達收購新球員,進行重建。
據悉,韋利安將會成為頭號清洗目標,呢位32歲巴西國腳上年8月由車路士加盟阿仙奴之後,表現乏善可陳,各項賽事上陣30場,仍然冇波入,曾經被利物浦名宿加歷查形容為「災難式簽人」,主帥阿迪達已經無意留用佢,慶幸韋利安係自由身加盟,即使低價出售佢,都冇蝕底。
至於前鋒拿卡錫迪雖然今季表現唔錯,各項賽事射入13球,但會方同呢位29歲法國國腳續約問題上有阻滯,由原本年初傾續約,推遲至今夏先傾,一旦談判失敗,就會出售佢,否則等到明夏約滿,拿卡錫迪自由身走人,兵工廠就會人財兩失。
25歲翼鋒尼高拉斯比比2019年以7,200萬鎊轉會費,由里爾加盟阿仙奴之後,踢唔出身價,阿仙奴為籌集資金,勢必搵呢位貴價貨開刀,就算減價賣走佢,應該都可以獲得一大筆資金。
另外,如果阿仙奴順利出售上述3人,就會用部份資金向皇馬買斷中場馬田奧迪加特,令球隊更加年輕有活力。