車路士兩蛋贈波圖 美臣蒙特破紀錄上位

20210408
東網電視
更多新聞短片
《串績王》新登場,最強博彩盤路過關神器:http://win.on.cc/football/ 
上星期喺英超經歷慘敗嘅車路士,周四(8日)凌晨歐聯8強首回合重整旗鼓,憑住美臣蒙特喺中場八面玲瓏嘅演出,「藍戰士」作客2比0擊敗葡超勁旅波圖,殺入4強機會高唱入雲,領隊杜曹賽後激讚球隊大腦美臣蒙特,認為佢可以躋身頂尖球員行列。
車路士今場表現唔係特別好,雖然控球較多但實際威脅唔大,多數時間都係進行激烈爭搶,喺迪姆華拿同夏維斯兩大貴價德國兵表現持續低沉下,美臣蒙特就成為鎖匙人物,佢喺31分鐘接應佐真奴費路傳送,巧妙轉身避開波圖守將後窄位抽入遠柱,呢球係美臣蒙特生涯第1個歐聯入波,同時以22歲87日之齡,成為車路士史上歐聯淘汰賽最年輕入球球員。
杜曹65分鐘用基斯甸普列錫同基奧特入替「德國孖寶」,球隊亦喺完場前5分鐘搵到「燕梳球」,芝維爾偷波後自己突破射成2比0,今次亦係車路士自2012年對拿玻里後(林柏特同泰利入波),首次有2位英格蘭本土球員喺歐聯同一比賽入波。
被譽為「新林柏特」嘅美臣蒙特賽後獲杜曹大讚:「我唔會為美臣蒙特嘅發展定上限,佢嘅潛力非常明顯,而且仲係個好好先生,佢願意學習、渴求勝利、思想開放,佢可以為任何領隊效力都交出表現,作為領隊我仲可以要求啲咩?佢就係頂尖球員。」