兩大門神做好戲　拿華斯、文迪勁堅！

《英超刨績王》加強版，最強數據一網打盡：http://win.on.cc/football/　

巴黎聖日耳門(PSG)同車路士喺歐聯8強首回合贏波，兩大門神基羅拿華斯同艾度亞文迪功勞極大，基羅拿華斯今場作出10次撲救，力抗拜仁慕尼黑排山倒海嘅攻勢；艾度亞文迪就再一次保持不失球，今屆歐聯第7場成功保持清白，打破車路士紀錄。

PSG作客拜仁雖然贏波，但全場被對手攻31次，當中有12次係命中目標，全靠基蘭拿華斯左飛右撲救出10球，PSG先至得以保住勝局。基羅拿華斯上場歐聯對巴塞隆拿已有9次撲救，包括救出美斯主射嘅12碼，呢位34歲門將寶刀未老，PSG總監李安納度賽後回應球會想買基安盧基當拿隆馬嘅傳聞：「當拿隆馬？我依家唔會講轉會，基羅拿華斯冇得頂！」

至於車路士成功克服上場被西布朗入5球嘅慘痛，今場再次「零封」波圖，門將艾度亞文迪今屆歐聯第7次保持不失，係車路士史上單屆歐聯最多不失球賽事門將。自從杜曹1月底執教車路士後，艾度亞文迪已經有10場比賽(各項賽事)不失球，係歐洲5大聯賽球會之中嘅No.1。