國際米蘭10連勝　帶開11分等捧盃

《英超刨績王》加強版，最強數據一網打盡：http://win.on.cc/football/　

周四(8日)凌晨意甲大戰，國際米蘭主場迎戰薩斯索羅雖然演出平平，全場只係得32%控球率，低憑住盧卡古嘅凌厲反擊1傳1射，帶領球隊贏2比1豪取聯賽10連勝，依家喺榜首領先次席嘅AC米蘭11分之多，重奪意甲冠軍指日可待。

國際米蘭今場大部份時間處於下風，不過反擊就極具效率，10分鐘盧卡古策動反擊長傳畀艾舒利楊格，自己隨即衝入禁區接應傳中頂入；67分鐘盧卡古再有反擊機會，今次佢推順後交出直線畀拿達路馬天尼斯射入，薩斯索羅喺完場前5分鐘破蛋，但無阻國際米蘭贏2比1。

國際米蘭依家喺意甲一支獨秀，教練干地賽後表示：「我哋仲未係冠軍，球季仲有好多比賽，愈接近終點我哋隻腳就會愈重，至少壓力會比好多已經冇嘢好爭嘅球隊重。嚟緊每場聯賽都係6分波，我哋要不斷贏波去將壓力轉移畀其他球隊。」