亨特拉爾延後掛靴　願為史浩克踢德乙

日職開鑼，即上《日職刨績王》：https://win.on.cc/football/league/jleague/index.html　

37歲荷蘭射手亨特拉爾季中由阿積士重返史浩克04之後，原本希望協助球隊護級之後，結束球員生涯。不過，呢支德甲球隊成績冇改善，降班幾乎已成定局，亨特拉爾為咗幫球隊將來重返德甲，亦決定改變初衷，打消掛靴念頭，準備留隊為球隊出戰德乙。

史浩克04上場德甲作客利華古遜，係亨特拉爾回巢後，首次正選上陣，並踢足全場，更加射入1球，可惜仍然輸1比2，已經落後尾3科隆13分，降班危機愈來愈大。

亨特拉爾表示，自己身體狀態良好，仲可以繼續球員生涯：「從身體狀況而言，可以繼續踢，退唔退休係取決於心態同頭腦，效力阿積士期間，我講過今夏退休，但你永遠唔知將來會發生咩事。」德國傳媒指亨特拉爾傾向再效力史浩克04多一季，希望協助球隊重返德甲之後，圓滿收山。