曼聯贏2球穩入歐霸4強 福仔平傳奇紀錄

20210409
東網電視
更多新聞短片
足球博彩神器,每日重心提供盡在《彩報》:http://win.on.cc/football/ 
歐霸盃奪冠大熱門曼聯,周五(9日)凌晨喺8強首回合作客2比0擊敗CF格蘭納達,次回合返主場晉級機會高唱入雲。曼聯今場一度老鼠拉龜,直到拉舒福特一次神來之筆,先至打破僵局,今場入波更令「福仔」追平卜比查爾頓、C朗拿度同朗尼3大傳奇嘅紀錄,認真威水!
拉舒福特今場負傷上陣,但仍然喺球隊無力破門嗰陣挺身而出,31分鐘域陀連迪路夫後場大腳踢前,原本喺中圈附近嘅拉舒福特突然加速,突破防線後一控一射都盡見功架。曼聯下半場有數次入球機會未能把握,去到完場前般奴費南迪斯博到12碼,佢自己親自操刀射成2比0,帶住2球優勢返主場踢次回合,應該非常穩陣。
延伸閱讀:【曼聯3大守將齊停賽 中堅要用佢?】
今場入波係拉舒福特今季歐洲賽第8個入球(歐聯6球、歐霸2球),係自2008年C朗拿度後曼聯第1個單季歐洲賽入8球球員,如果只係計英格蘭球員,更加要數到64/65球季嘅卜比查爾頓。另外,拉舒福特今季各項賽事累積20球,係自朗尼喺08/09同09/10球季後,曼聯第1個連續2季入波達20+大關球員。
曼聯領隊蘇斯克查賽後亦大讚拉舒福特:「第1個入球好精彩,拉舒福特嘅走位、控球同射門都係神奇,佢同般奴費南迪斯永遠都交到貨,自然係球隊最重要嘅球員。」