曼聯3大守將齊停賽 中堅要用佢?

20210409
東網電視
更多新聞短片
《英超刨績王》加強版,最強數據一網打盡:http://win.on.cc/football/ 
曼聯喺歐霸盃8強首回合作客贏CF格蘭納達2球,絕對係一個理想賽果,但美中不足嘅係,哈利馬古尼、勞基梳爾同麥湯米尼3名「孭緊簿」嘅球員,今場竟然齊齊拎到黃牌面要喺次回合停賽,而且3人都係防守主力,領隊蘇斯克查賽後表示:「今場並唔係完美賽事,因為我哋有3個人要停賽,嚟到西班牙贏2比0係非常好嘅賽果,但我哋知道唔可以停落嚟,次回合都要繼續進攻同爭取勝利。」
3位停賽球員當中,左閘勞基梳爾今仗半場休息期間已經退下火線,由巴西嘅阿歷士迪尼斯頂上;麥湯米尼嘅位置亦有費特洛迪加斯同尼曼查馬迪可以替換,理論上都唔係咩大問題。唯獨哈利馬古尼嘅中堅位置有啲麻煩,事關慣常替補艾歷拜利早前喺國際賽期間確診新冠肺炎,曼聯只係得番杜安薛比,甚至有傳因膝傷問題超過1年未踢過嘅菲爾錫斯都要候命,或者會成為曼聯唯一隱憂。