羅馬反勝阿積士　火爆執波仔最搶鏡

足球博彩神器，每日重心提供盡在《彩報》：http://win.on.cc/football/　

周五(9日)凌晨歐霸盃8強首回合賽事，意甲勁旅羅馬作客2比1反勝阿積士，門將包盧比斯屢救險球當然係贏波功臣，不過今場最搶鏡嘅係阿積士嘅執波仔，比賽尾段佢因為不滿羅馬守將卡拉科利拖延時間，將個波大力掟落對方面上，非常火爆。

阿積士主場出擊有個好開始，卡拉臣39分鐘入波先開紀錄，下半場阿積士本來可以擴大比數，但杜辛泰迪治嘅12碼被包盧比斯撲出，呢位羅馬門神今場作出8次撲救，係球隊反敗為勝關鍵。羅馬大難不死後，57分鐘就由羅倫素柏歷堅尼追成平手，完場前3分鐘更由羅渣伊賓尼斯攻入致勝球。

羅馬後防卡拉科利喺補時階段掟界外球嗰陣，刻意拖延時間，當時阿積士嘅執波仔掟波畀佢，卡拉科利就故意唔要走去拎更遠嘅波，結果個執波仔惱羞成怒，大力將另一個波掟向佢塊面，最慘係卡拉科利仲因為不君子行為食黃牌。卡拉科利賽後表示：「我唔會話我尊重佢(執波仔)，但我明白佢點解咁做，當我見到對手拖時間我都會嬲，幸好我喺當時可以保持冷靜。」