奧迪加特都傷埋　阿仙奴搵定接班人

《串績王》新登場，最強博彩盤路過關神器：http://win.on.cc/football/　

阿仙奴近期傷兵滿營，繼大衛雷斯同基蘭泰亞尼後，近期表現出色嘅挪威中場馬田奧迪加特，早前喺國際賽期間亦受傷而回，周五(9日)凌晨嘅歐霸盃都未有上陣，領隊阿迪達賽後證實，馬田奧迪加特傷勢比預期中嚴重，預計要再缺陣多1至2場，周一(12日)凌晨作客錫菲聯嘅英超幾乎肯定唔踢得，下星期作客布拉格斯拉維亞嘅歐霸盃生死戰亦都上陣成疑。

除咗短期內未能上陣之外，馬田奧迪加特喺阿仙奴嘅長期發展亦都係個問號，事關皇家馬德里嘅借用合約未有買斷條款，皇馬亦未決定係咪將佢回收。據意大利媒體爆料，阿仙奴已經為馬田奧迪加特物色替補人選，其中一個目標係AC米蘭嘅查漢奴古，呢位土耳其國腳今夏回復自由身，「性價比」相當之高，不過車路士、曼聯同祖雲達斯都對佢虎視眈眈，阿仙奴要搶人難度極高。