大隻佬破48場入球荒！狼隊補時絕殺富咸

日職開鑼，即上《日職刨績王》：https://win.on.cc/football/league/jleague/index.html　

周六(10日)凌晨舉行嘅英超獨腳戲，狼隊踢到補時2分鐘，憑「大隻佬」艾達馬查奧爾射入全場唯一入球，作客以1比0擊敗富咸，結束連續5場聯賽不勝頹勢，艾達馬查奧爾亦打破48場英超入荒，終於取得今季首個聯賽入球，真係得來不易。

身處降班區嘅富咸原本有個入波黃金機會，可惜羅夫度斯卓克頭槌攻門斜出，臨完上半場，狼隊前鋒韋利安荷西近門頂入，但球證睇完VAR之後，發現助攻嘅普丹斯越位在先，判入球無效。

最終踢到補時2分鐘，艾達馬查奧爾右路殺入禁區，窄角度勁射入網，為狼隊驚險全取3分，呢位西班牙國腳自2019年12月之後，終於再次取得英超入球，至於傳波畀佢嘅法比奧施華，以18歲零264日成為今季英超最年輕助攻球員。

至於富咸輸波之後，已經4連敗，進一步加深降班危機。