林柏特被炒後首次受訪:我冇怨過阿布

20210410
東網電視
更多新聞短片
《英超刨績王》加強版,最強數據一網打盡:http://win.on.cc/football/ 
林柏特今年1月被車路士免除領隊職務,事隔3個月,呢位車路士功勳球員首次接受訪問,畀佢講講心底話。林伯表示永遠感激同深愛車路士,對老闆阿布拉莫域並無怨恨,仲話近期收到好多邀請,等待時機成熟東山復出。
車路士前季捧走歐霸盃後未有留用沙利,反而從打比郡邀請林柏特回巢執教,球員時代林柏特效力車路士13年,亦係隊史最佳射手,但擔任主帥卻只有短短18個月,因成績未達預期被辭退,他表示:「無論你認為自己有幾叻,喺任何情況下,你都有可能被炒魷,我好感激車路士畀我執教機會,呢段時光極之美好。」
林柏特坦言,今次執教經歷,最遺憾係疫情來襲,很多比賽只能閉門比賽,令佢好掛住車路士嘅球迷:「由賽事重開到我離隊,都冇球迷,我好掛住佢哋,我知道球迷對球員有幾重要,亦好清楚球迷對比賽嘅影響,希望可以再見到球迷重新入場。」
被炒後,林柏特暫時無業,留家陪伴親人,佢話:「呢段時間其實都收到邀請,但都唔適合我,我一直關心球圈情況,正尋求時機重新執教,因為我好享受領軍嘅感覺。」