施丹承認皇馬筋疲力盡　利物浦機會來了

最強博彩盤路過關神器《串績王》：http://win.on.cc/football/　

皇馬喺西甲「國家打吡」以2比1擊敗巴塞隆拿，爭標形勢大好，但係教練施丹透露，球員體力已經到達極限，再咁踢落去，都唔知點樣捱到收咧。皇馬筋疲力盡之下，嚟緊周四(15日)凌晨歐聯8強次回合作客利物浦，存在隱憂。

皇馬上周中歐聯8強首回合主場以3比1擊敗利物浦，今場鬥巴塞，正選陣容只係換咗1人，由費達歷高華維迪代替馬高阿辛斯奧。雖然「銀河艦隊」最終贏波，但一班主力真係踢到殘，

施丹話：「今場波非常難踢，上半場有優勢，但下半場經歷煎熬，我哋已經連續2場比賽搏到盡，球員筋疲力盡，我都唔知大家點樣完成今個球季，體能已經到達極限。」

皇馬現時有唔少傷病問題，後備力量亦冇以往深厚，加上3位主力賓施馬、卻奧斯、莫迪歷都超過30歲，面對連場大戰，體力上的確吃不消，難怪施丹感到憂慮。歐聯8強次回合，利物浦隨時可以趁皇馬疲憊，踢場逆轉勝。