連格繼續大爆發 錘仔差啲又衰收尾

20210411
東網電視
更多新聞短片
足球博彩神器,每日重心提供盡在《彩報》:http://win.on.cc/football/ 
周日(11日)晚英超「爭前4大戰」,韋斯咸憑狀態大勇嘅連格梅開二度,主場以3比2擊敗李斯特城,壓過車路士及利物浦重返聯賽榜第4位,目前只比3哥李斯特城少1分,繼續向參加下屆歐聯目標進發,不過連今仗在內,韋斯咸已經連續3場聯賽喺領先3球情況下,被對手從後力追,領隊莫耶斯如果唔想飽食驚風散真係要諗諗計。
由於車路士、利物浦早一日齊齊贏波,韋斯咸開波前已跌落聯賽榜第6位,為保持爭入前4機會,韋斯咸一開波就主動搶攻,上半場29分鐘,華迪美高法爾右路地波傳中,連格禁區邊第一時間撞射近柱入網,為韋斯咸打開紀錄;完半場前1分鐘,查洛保雲突破越位右路快放,橫傳予無人看管嘅連格射成2比0返入更衣室。連格自從1月尾由曼聯以借將身份加盟,為韋斯咸上陣9場一共射入8球兼交出3次助攻,腳風順到冇朋友。
換邊後僅3分鐘,又係連格策動攻勢,佢喺左路先橫傳畀湯馬士蘇錫克,後者再交畀查洛保雲射成3比0,亦係韋斯咸連續3場聯賽領先對手3比0,但同對上2場被阿仙奴逼和3比3、作客險勝狼隊3比2嘅劇本一樣,韋斯咸後防突然夢遊球場,被李斯特城射手伊恩拿祖分別喺70分鐘及補時1分鐘連入2球,好彩最後李斯特城嘅角球攻勢,韋斯利科芬拿頭槌攻門未能命中目標,最終韋斯咸有驚無險全取3分。
韋斯咸贏出呢場「6分波」後,現時第3位嘅李斯特城同第6位嘅利物浦只相差4分,加上緊隨其後仲有熱刺及愛華頓,邊隊攞到下屆歐聯入場券仲有排爭。